مسیر ورځپاڼه: د حکومت «سرې کرښې»بیا ماتېږي

عزم (دوشنبه، ۰۶، زمری، ۱۳۹۹ل): مسیر ورځپاڼې په خپله نننۍ سرلیکنه کې د افغان سولې په تړاو د حکومت په بدلېدونکي دریځ، د زلمي خلیلزاد په سفر او د پاتې ۶۰۰طالب بندیانو په خوشې کولو باندې بحث کړی دی.

ورځپاڼې لیکلي، کله چې زلمي خلیلزاد سفرونه پیل کړل، نو د حکومت دریځ هم بدل شو او پرون یې ۵۰طالب بندیان خوشې کړل.

«د افغان سولې لپاره د امریکا ځانګړي استازي افغانستان، پاکستان، قطر او ځینو نورو هېوادونو ته تازه سفرونه پیل کړي دي. له دې سره حکومت هغه پنځوس طالب بندیان هم خوشې کړي چې پخوا یې له خوشې کولو انکار کاوه. د دې تر څنګ حکومت ادعا کوي چې ځیني خوشې شوي طالب بندیان جګړې ته ورګرځېدلي، خو طالبان وايي حکومت پر خوشې شوو طالب بندیانو چاپي اچوي، هوايي بریدونه پرې کوي او نیسې یې. دواړه لوري یو د بل تورونه ردوي.»

د سرلیکنې له مخې، د حکومت سرې کرښې هره ورځ ماتېږي؛ خو بیا هم له هرې وسیلې کار اخلي، چې د سولې روان بهیر له ځنډ سره مخ کړي.

«داسې ښکاري چې د خلیلزاد له سفر سره یو ځل بیا د سولې په ټپه درېدلی حالت بدلېږي او ځیني پرمختګونه پکې کېږي. همدا چې خلیلزاد سفر پیل کړ، حکومت دریځ نرم کړ، د بندیانو خوشې کول یې پیل کړل. خلیلزاد هم ویلي چې د بندیانو د خوشې کولو ستونزه به هواروي او د تاوتریخوالي د کمولو لپاره به هڅې کوي. د افغانستان حکومت د شپږو سوو طالب بندیانو د نه خوشې کولو خبره کړې وه چې له دې سره تاوتریخوالی زیات شوی و او د سولې خبرې په ټپه درېدلې وې. اوس چې خلیلزاد را روان دی، ښکاري چې یو ځل بیا د حکومت سرې کرښې ماتې شوي او پاتې طالب بندیان به هم خوشې کړي. دردوونکې دا ده چې حکومت د بندیانو د خوشې کولو په اړه د افغانانو غږ نه اوري، د سولې لپاره دا کار نه کوي، خو چې کله خلیلزاد را روان شي او فشارونه پیل شي، نو بیا دا کار کوي او سرې کرښې یې ماتې شي. د دغو سرو کرښو او د بندیانو د نه خوشې کولو له امله تاوتریخوالی زیات شو او ګڼ افغانان پکې ووژل شول، اوس چې حکومت خپل دریځ بدلوي او بندیان خوشې کوي، نو هغو کورنیو ته به څه ځواب ولري چې په وروستیو تاوتریخوالو کې یې غړي قرباني شوي دي!؟»

د مسیر په باور، حکومت د سولې په تړاو ثابت دریځ نه لري او هیله یې لرله چې جوبایډن به هم په افغانستان کې د جګړې پلوي وکړي او دوی به په واک کې پاتې وي، خو جوبایډن یې وروستۍ هم هیله هم له خاورو سره خاورې کړه.

«د سولې په برخه کې د افغانستان د حکومت دریځ نه ثابت دی او نه هم د افغانستان او افغان ولس په ګټه. له همدې امله دا دریځ باید بدل او ثابت شي. په ارګ کې چارواکي نور باید دا فکر پرېږدي چې دوی د خنډونو په جوړولو سره د سولې پروسه ځنډولی او خپل واک غځولی شي. د دوی تمه جوبایډن ته وه، اوس چې جوبایډن هم وايي، طالبان د افغانستان داخلي ستونزه ده او موږ به هلته خپل ځواکونه ونه ساتو، نو حکومتي مشران باید واقعیتونه ومني. نور د سولې د مخالفت پر ځای د واقعي سولې لپاره کار او هلې ځلې وکړي. حکومتي مشران باید ومني چې هېڅوک حاضر نه دي چې سوله د دوی د واک د دوام قرباني کړي او له دوی سره ودرېږي. چارواکي باید اوس د سولې ملاتړ وکړي، خنډونه لري کړي او ټول هغه کارونه وکړي چې سوله بریالۍ کولی شي. د دوی ټوله هڅه باید اوس دا وي چې څه ډول په سوله کې د افغانانو ګټې زیاتولی او د زیانونو مخه نیولی شي. دوی باید اوس پر همدې تمرکز وکړي او د افغانستان د خلکو په څنګ کې د سولې د بریا او د افغانانو د امن، عزت او سرلوړۍ لپاره کار وکړي. له دې پرته سوله کېدونکې ده او دوی به منزوي او لا بدنام شي.»

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button
Close
Close
%d bloggers like this: