د موسکا څرک

کره خو تریخ ځواب:
یو استاد لیکي: زما د شاګرد پلار بازار کې کجورې خرڅولې، هماغه زما شاګرد زوی یې هم ورسره ناست و، په ټوکه او خندا مې ورته وویل: بابا زه ستا د زوی استاد یم، ښې کجورې په ښه بیه راکړه، هغه راته کړه: ته وا زما له زویه دې پیلټ راته جوړ کړی! خو دا دی زما څنګ ته ناست دی کجورې خرڅوي… او په دواړو سترګو ښې کجورې درکوم…

د سوالګر ډالۍ:
‏مېړه یې چې له کاره راغی مېرمن یې خپه وليدله، ول څه چل دی؟! هغې ورته کړه هغه بېګا مو چې سوالګر ته ماښامنۍ ډوډۍ ورکړه، هغه نن راغلی و، بهر یې ماشوم ته دا کتاب ورکړی و … مېړه یې په موسکا سره لاسونه لپه کړل او سوالګر ته یې دعا وکړه.
د کتاب نوم: “د پختن زده کړه”

مثبت او منفي تعبیرونه:


یوه هوښیار له دکاندار نه وچه مېوه واخیستله، هغه سره یې ماشوم زوی هم و، ماشوم ته دکاندار وویل: ورشه ځان ته مېوه درواخله! ماشوم نه وراخیستله، اخیر دکاندار پاڅیدی یو دوه لپې مېوه یې ورکړه. بهر چې ووتل پلار یې ورته وویل: مېوه دې پخپله ولې نه دراخیستله؟ ماشوم وویل: د دکاندار لاسونه زما له هغو غټ دي … وای د ښو غوښو ښه شوروا وي! او #هوښیاران له ماشومتوبه لا هوښیار وي.


یوه بخيل او کنجوس له دکاندار نه وچه مېوه واخیستله، هغه سره یې ماشوم زوی هم و، ماشوم ته دکاندار وویل: ورشه ځان ته مېوه درواخله! ماشوم نه وراخیستله، اخیر دکاندار پاڅیدی یو دوه لپې مېوه یې ورکړه. بهر چې ووتل پلار یې ورته وویل: مېوه دې پخپله ولې نه دراخیستله؟ ماشوم وویل: د دکاندار لاسونه زما له هغو غټ دي… وای خړ سپی د لېوه ورور دی. د بخیلانو زامن هم پلرونو روزلي وي…

موږ هر یو د خپل تمايل او مینې پر اساس په دې توګه خبرې مثبتې او منفي لور ته اړوو. الا من رحم الله. که داسې نه ده؟

خپل پرستي:
ول مازدیګر اذان وشو چا موبايل راته وکړ، خبرې مې چې ورسره پیل کړې مور مې راته کړه: ستا ملګري لکسې یهودیان دي، لمانځه ته نه ځي؟! مال مورې ماما مې دی! ول جار، داسې ښکاري چې د دوی ځای کې لا اذان نه دی شوی…

بخيل:
بخیل ته یې مېرمنې زېری ورکړ چې د ګران زوی مو غاښونه شوي!
هغه ول زېری څه معنا؟!
دې سره خو د ډوډۍ دښمنان لا زیات شول…

حامد افغان

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button
Close
Close
%d bloggers like this: