که پاچا دی، که وزير او که عسکر دی – “ضعيف”

 

د  مؤمن  وينــه  چــې  هـدر  ګڼي  کــر  دی
د  الله  د  لـــوی  قــانون  نـــه  ناخـــبر  دی

قيمت  نلري  انسان  تــر  هــرڅه  ګران  دی
قيمتي  د  ټـول  جـهان  تـر  سيم  او زر  دی

د  احــسن  الخـالقين  احــسن  مخلوق  دی
هـم  پـه  ټـولـو  مخلوقاتو  کـې  رهبــر  دی

که توهين سي که تحقير او که مهجور سي
کـه ښکنځل ورته کـوي او کـه يې ځـور دی

ټول حرام دي پـه هـر چا او هـم عذاب سي
چــې بيـا هـم بـل سپکول غـواړي ابتــر دی

پــــه  نــــاحقه  قـتلول  يــــې  لو ګــناه  ده
پـــريکول  د  يــوه  ســر  د  ټولو  ســر  دي

ټـــول  وژنـــه  د  يـــوه  انـــسان  وژل  دی
دا  ارشــــاد   د   تفسيرونـــو   مفســر   دی

انسانان  د  انـس  الفت  پــه  نــوم  ياديږي
که  له  دي  مفهومه  مخ  اړه  وي  خـر  دی

که  د  خدای  لاره يې پريښودل  ګمراه سو
قرآن  واي  تــر  حيوان  هــم  بـد  بدتر  دی

د  مظلـوم  آه  حجـــاب  نــلري   اسمان  ته
ظالم خوار دی ظالم پـړ خاوري پـه سـر دی

بــــرآئت  غـــواړي  ضعيف  لــــــه  ظالمانو
که  پاچا  دی  که  وزير  او  که  عسکر   دی
مولوي عبدالسلام “ضعيف”

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button
Close
Close