مسیر: امریکا په خپلو ژمنو کې دروغجنه ده

عزم (دوشنبه، ۱۵تله، ۱۳۹۸ل): له کابله خپرېدونکې ورځپاڼې«مسیر» خپله نننۍ سرلیکنه د اکټوبر اوومې ته ځانګړې کړې ده. ورځپاڼې« د اکټوبر اوومه، زموږ د اوسنۍ بدمرغۍ پیل» تر سرلیک لاندې لیکلي، د امریکايي یرغل اتلس کلونه پوره شول او پر افغانانو داسې حکومت وتپل شو، چې بنسټ یې په جرمني کې کېښودل شوی و.

«نن د اکټوبر اوومه او د افغانستان د معاصر تاریخ یوه توره ورځ ده. له نن څخه پوره ۱۸ کاله وړاندې امریکا د سپټمبر د یوولسمې د بریدونو په پلمه، پر افغانستان یرغل وکړ. د طالبانو واکمني یې ړنګه کړه او د جرمني په بن کې  جوړ شوی حکومت یې پر افغانستان واکمن کړ. له برید اتلس کاله وروسته لا هم جګړه روانه ده، ښځې، ماشومان او بې ګناه وګړي پکې وژل کېږي.»

ورځپاڼې لیکلي، د سپټمبر د یوولسمې په پېښه کې هېڅ افغان ښکېل نه و، خو بیا هم امریکا پر افغانستان یرغل وکړ او د درې زره امریکايانو غچ یې له سوونه زره افغانانو واخیست.

«د سپټمبر د یوولسمې په پېښه کې هېڅ افغان ښکېل نه و، خو امریکا پر افغانستان یرغل وکړ. په هغه پېښه کې شاوخوا دری زره امریکایان ووژل شول، خو امریکا یې غچ زموږ له بې ګناه وګړو اخلي. پوره ۱۸ کاله کېږي چې موږ له امریکايي وحشت سره مخ یو، سلګونه زره افغانان وژل شوي، سلګونه زره نور ټپیان شوي دي او لسګونه زره معیوب شوي دي. امریکا ۱۸کاله خپلې نوې او ممنوعه وسلې پر افغانانو استعمال کړې او ویې ازمویلې. د بمونو مور یې وکاروله، سرتېرو یې د خلکو په وژلو کې نوې تجربې وکړې او پر خلکو یې نښه ویشتل زده کړل. امریکايي وحشیانو ۱۸کاله د افغانستان په کلي کلي او کور کور کې غم خپور کړ، وحشت یې وکړ او لوټه لوټه او کاڼی کاڼی یې پر وینو رنګ کړ.»

ورځپاڼې لیکلي، امریکا په خپلو ټولو ژمنو کې دروغجنه ثابته شوه. دوی چې ۱۸کاله مخکې کوم شعارونه ورکول، اوس ټول سرچپه دي او زموږ ژوند، حکومت او اقتصاد ورځ تر بلې خرابېږي.

«دوی په ۲۰۰۱ ز کال کې ویل چې له ترهګرو ډلو مو خلاصوو، خو اوس وايي چې ۲۲ ترهګرې ډلې دلته فعالیت کوي. زموږ خاوره یې د ترهګرو پر مرکز بدله کړه. هغه وخت یې ویل چې افغانستان له نشه يي توکو خلاصوو، خو اوس یې د نشه يي توکو پر مرکز بدل کړی. ویل یې چې دولت جوړونه کوو، خو دلته یې د نړۍ تر ټولو فاسد، ناکاره او بېکاره حکومت پر موږ واکمن کړی. هغه وخت به یې د ښه راتلونکي او اقتصادي ودې خبرې کولې. دا دی له ۱۸ کاله اشغال وروسته هم افغانستان له سختو اقتصادي ستونزو سره مخ دی، خلک تښتي، ځوانان اروپا او نورو هېوادونو ته ځانونه باسي، څوک ورسېږي او څوک په سیند کې غرق شي، د ځینو مړي ساحل ته راشي او ځینې د بحري ژوو خوراک شي. له امریکايي یرغل ۱۸ کاله وروسته هم په افغانستان کې ۵۷ سلنه خلک د بېوزلۍ تر کرښې لاندې ژوند کوي او یو څو بیا د امریکا په مرسته د خلکو په وینو په جوړو شوو دنګو ماڼیو او د ډبرینو دیوالونو شاته د عیش او عشرت ژوند کوي. امریکا موږ ته د ډیموکراسۍ د راوړلو ژمنه کوله، خو اوس افغانستان د مافیا، قاچاقبرو او د امریکايي قراردادیانو په ګرو کې دی. هغوی چې د امریکا قراردادیان دي، زور لري، زر لري، خلک وژني، واک لري او تر بل هر چا په لوړه کچه په حکومت، پارلمان او خصوصي سکټور کې واکمن دي.»

ورځپاڼې د دې ټولو ناورینونو څخه د خلاص یوازېنی لاره سوله او خپلواکۍ ګڼلې ده او له سیاسونو یې غوښتي، چې د سولې لپاره دې معقوله لاره وګوري.

«د امریکايي یرغل پایلې موږ ته مرګونې وې. امریکايي یرغل او حضور زموږ لپاره له بدبختیو ډک دی. له بده مرغه دغه حضور لا هم زموږ امنیت، ثبات، اقتصاد، خپلواکي، راتلونکی او هر څه له ګواښ سره مخ کړي. دوی لا هم غواړي چې موږ ووژل شو، وږي شو، هېواد پرېږدو او د دوی د ګټو قرباني شو. پکار ده چې اوس موږ سترګې پرانیزو او نور له امریکايي حضور او وحشت څخه د ځان خلاصونې معقولې او کارنده لارې وکاروو. پکار ده چې د یوې داسې سولې لپاره لاسونه ورکړو چې د ټولو بهرنیانو د لاسوهنې مخه ونیسي او موږ د خپل حکومت، عزت او سرلوړی لوري ته ولاړ شو.»

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Close