جولای 23, 2019

چابهار بندر: د هند او افغانستان ترمنځ سوداګریزه راکړه ورکړه په ټپه دریدلي

چابهار بندر: د هند او افغانستان ترمنځ سوداګریزه راکړه ورکړه په ټپه دریدلي

 

عزم (چهار شنبه،۱۸،غویي،۱۳۹۸)

چاوراکي وايي، د چابهار بندر تر پرانيستې وروسته د هند او افغانستان ترمنځ د دې بندر له لارې یوازې یو ځل صادرات او واردات شوي دي او نور دا لړۍ په ټپه دریدلې.

له دغه بندر څخه  د سوداګریزو توکو په برخه کې چې د تیر ۱۳۹۷ د کب په میاشت کې افغان توکي هند ته ولیږدول شول،  تر اوسه بیا کوم نوښت نه دی راغلی او دا پروسه د نامعلومو دلایلو له مخې بنده شوې ده.

د سوداګرۍ خونې مرستیال خان جان الکوزی د دې خبر د پخلي تر څنګ وایی چې “ په چابهار بندر کې تخنیکي امکانات نه‌شته، سکنر نه‌شته، د مالونو د طی مراحلو لپاره شرایط سخت دي، په مالونو ډېر وخت تېرېږي او کومې ژمنې چې ایران، هندوستان او افغانستان‌ یې کوي، نه‌ عملي کېږي.“

سوداګرۍ خونه وایي، که څه هم د دریو واړو هیوادونو مشرانو د دغه بندر د لاتقویې په موخه ګڼې ژمنې کړې،  خو لا هم کوم عملي بڼه نه لري.
بلخوا بیا د کندهار ولایت د سوداګرۍ خونې رئیس نصرالله زهیر هم د سوداګریزو توکو د نه لیږد پخلی کوي خو د لامل په هکله یې وایي چې د افغان سوداګریزو توکو د کمښت له امله د صادراتو لړۍ په ټپه دریدلې ده.

په همدې حال کې د سوداګراۍ او صنایعو وزارت بیا پر دې مسیر د صادراتو او وراداتو د توقف په هکله له څه ویلو ډډه کوي خو وایي چې د دریو واړو هیوادونو مشران د یاد سوداګریز بندر پراختیا ته ژمن دي.

تر اوسه د دغه بندر له لارې ۳۰۰ ټنه واردات له هندوستان او ۸۰۰ ټنه صادرات همدغه هیواد ته شوي دي.

Related posts